On traditional vaidya training programme

🌹പാരമ്പര്യ നാട്ടുവൈദ്യ ഗുരുകുലത്തിന്റെ പ്രസക്തി🌹 https://www.facebook.com/share/p/19qUL6KXcp/ പാരമ്പര്യ നാട്ടുവൈദ്യ സംയുക്ത സമിതിയുടെ ആഭിമുഖ്യത്തിൽ "പാരമ്പര്യ നാട്ടുവൈദ്യ ഗുരുകുല വിദ്യാപീഠം" ആരംഭിക്കാനുള്ള ശ്രമങ്ങൾ നടക്കുകയാണല്ലോ. പാരമ്പര്യവൈദ്യ സംഘടനകളുടെ നേതൃത്വത്തിൽ നടക്കുന്ന അത്തരം ശ്രമങ്ങൾക്ക് ഇക്കാലത്ത് ഏറെ പ്രസക്തിയുണ്ട്. അതിനാൽ പാരമ്പര്യ വൈദ്യവിദ്യയുടെ പഠന-പരിശീലനങ്ങൾക്കുവേണ്ടിയുള്ള പ്രസ്തുത വൈജ്ഞാനിക ശ്രമങ്ങൾ തീർച്ചയായും സ്വാഗതാർഹമായൊരു കാര്യമാണ്. അത്‌ പാരമ്പര്യത്തിന്റെ അറ്റുപോയാകണ്ണികൾ പുതിയ രീതികളിൽ വീണ്ടെടുക്കാനുള്ള അവസരമൊരുക്കിയേ ക്കുമെന്ന് പ്രതീക്ഷിക്കുന്നു. കുടുംബവഴിയായും ഗുരുശിഷ്യപരമ്പരയായുമുള്ള അനൗപചാരിക പ്രായോഗിക പരിശീലനമായിരുന്നു മുൻപുണ്ടായിരുന്നത്. വൈദ്യത്തിന്റെ കാര്യക്ഷമതയും ഗൗരവവും നിലനിർത്തി യിരുന്ന പഠനരീതിയായിരുന്നു അന്നുണ്ടായിരുന്നത്. കലാകാലമായി തുടർന്നുവന്നിരുന്ന പാരമ്പര്യ വിദ്യാവിനിമയ പ്രക്രിയയില്ലാതാക്കപ്പെട്ടത് പാശ്ചാത്യ അധിനിവേശ വാഴ്ചയിലൂടെയുള്ള കൊള്ളയടികളിലൂടെയാണ്. ആധുനിക വൈദ്യശാസ്ത്ര വിദ്യാഭ്യാസ പദ്ധതികൾ ഏകപക്ഷീയമായി അടിച്ചേൽപ്പിച്ചുകൊണ്ടാണ് പാരമ്പര്യവൈദ്യങ്ങൾ തകർക്കപ്പെട്ടത്. പാരമ്പര്യത്തിന്റെ നൈരന്തര്യത്തിലൂടെയുണ്ടാകേണ്ട വികാസ പ്രക്രിയകളാണ് തടസ്സപ്പെട്ടത്. സ്വദേശീയമായ വൈദ്യശാസ്ത്രാന്വേഷങ്ങളുടെ അടിത്തറയും അതുവഴി നാശിപ്പിക്കപ്പെട്ടു. അങ്ങനെയൊരു ചരിത്രപരമായ ദുരന്തമുണ്ടാക്കിയ കുഴപ്പങ്ങൾ ഇന്നും അപരിഹാര്യമായി തുടർന്നുവരികയാണ്. ആധുനിക വൈദ്യശാസ്ത്ര വിദ്യാഭ്യാസത്തിന്റെ ചട്ടക്കൂടിലേക്ക് കൊണ്ടുവന്ന് ചില പാരമ്പര്യവൈദ്യങ്ങളെ ഔപചാരിക ബിരുദപഠനരീതിയിലേക്ക് മാറ്റിയിട്ടുണ്ട്. എന്നാൽ അങ്ങനെ ഉണ്ടാക്കിയ ആധുനിക പരിഷ്കാരങ്ങളാണ് യഥാർത്ഥത്തിൽ പാരമ്പര്യ വൈദ്യത്തിനെതീരെ ഉണ്ടായ ഏറ്റവും കനത്ത പ്രഹരമായിട്ടുള്ളത്. സാമൂഹിക-സാംസ്‌കാരിക പരിസരങ്ങളിൽ നിന്ന് മാറിയുള്ള, സിദ്ധാന്ത പ്രധാനമായ പാരമ്പര്യവൈദ്യ പഠനത്തിന്റെ പ്രായോഗികമായ കാര്യക്ഷമത ഏറെ വെളിവാക്കപ്പെട്ടിട്ടുണ്ട്. സായിപ്പന്മാരുടെ ആധുനിക ശാസ്ത്രക്കുപ്പായത്തിൽ കയറിക്കൂടിയ പാരമ്പര്യ-വരേണ്ണ്യക്കാരാണ് ഇന്ന് ജനകീയ വൈദ്യപാരമ്പര്യങ്ങൾക്കെതിരെ കോടാലിക്കൈകളായിമാറിയിട്ടുമുണ്ട്. ബിരുദയോഗ്യതയുടെയും നിയമ അംഗീകാരത്തിന്റെയും പേരിൽ സ്വദേശീയ വൈദ്യവിദ്യകളുടെ അവശേഷിക്കുന്ന നന്മകളെയും ഫലസിദ്ധി സാധ്യതകളെയും ഉന്മൂലനം ചെയ്തുകൊണ്ടിരിക്കുന്നുമുണ്ട്. എന്നാൽ, എല്ലാ കൊള്ളക്കോടാലികൾക്കിടയിലും ജനകീയ വൈദ്യങ്ങൾ അതിജീവിച്ചുകൊണ്ടിരിക്കുന്നതിന്റെ തെളിവുകളാണ് ലോകത്തെല്ലായിടത്തുനിന്നും വന്നുകൊണ്ടിരിക്കുന്നത്. ആധുനിക വൈദ്യത്തിന്റെ ഉള്ളിൽനിന്നുതന്നെ ഉണ്ടായിട്ടുള്ള 'ബദൽവൈദ്യ', 'അനുബന്ധവൈദ്യ', 'സമന്വയവൈദ്യ', 'സമ്മിശ്രവൈദ്യ', 'കൂട്ടുവൈദ്യ', 'സമഗ്ര വൈദ്യ', 'ഉദ്ഗ്രന്ഥിതവൈദ്യ' ആദർശങ്ങളും പ്രസ്ഥാനങ്ങളും അതാണ്‌ കാണിക്കുന്നത്. ഈ ആദർശക്കാരും പുതിയ ശാസ്ത്രക്കുപ്പായത്തിൽത്തന്നെയാണുള്ളത്. അ രീതിയിലുള്ള പാരമ്പര്യവൈദ്യ നവോത്ഥാനം ഏഷ്യാ -ആഫ്രിക്ക-തെക്കെഅമേരിക്ക രാജ്യങ്ങളിൽ വ്യാപകമായി നടക്കുന്നുണ്ട്. പാരമ്പര്യവൈദ്യ പ്രണയവുമായി അവതരിച്ചുകൊണ്ടിരിക്കുന്ന അത്തരം 'പയമത്തിരിച്ചുവരവു'കളിലും ചതിക്കുഴികൾ ഏറെയുണ്ട്. 'ശാസ്ത്രീയന്യായീകരണ' സിദ്ധാന്തത്തിന്റെ കോടാലിയിൽത്തന്നെയാണ് അവരുടെ പിടിയിപ്പോഴുമുള്ളത്. ഗവേഷണവും സംവാദവും പുതിയ അറിവുകൊള്ളയുടെയുടെയും ചൂഷണത്തിന്റെയും പര്യായങ്ങളാണ്. ആ നിലയിൽ, സ്വദേശീയമായ അറിവുപാരമ്പര്യങ്ങളെ വാരിപ്പുണർന്ന് ഇല്ലാതാക്കാനുള്ള, ആധുനിക രീതിയിൽ 'ശാസ്ത്രീയമാക്കി' വികൃതമാക്കാനുള്ള, ആസൂത്രിത നിയമങ്ങളിലൂടെ അമർച്ചചെയ്യാനുള്ള ശ്രമങ്ങൾ തകൃതിയായി നടന്നുകൊണ്ടിരിക്കുകയാണ്. ഏതെങ്കിലും കടുത്ത രോഗത്തിനുണ്ടായ ചികിത്സാനുഭവത്തിന്റെ പശ്ചാത്തലാത്തിലാണ് ഇന്ന് പലരും പാരമ്പര്യവൈദ്യന്മാരാകുന്നത്. തുടർച്ചയില്ലാത്ത പുതിയ ശിഷ്യത്വത്തിന്റെയും വഴിയിൽ ഒറ്റപ്പെട്ട നിലയിൽമാത്രമാണ് ഇക്കാലത്ത് പാരമ്പര്യവൈദ്യന്മാരുണ്ടാകുന്നത്. കുടുംബപാരമ്പര്യങ്ങളുടെ അറ്റുപോയകണ്ണികൾ ചേർത്തുവെക്കാനാകാത്ത സാഹചര്യമാണുള്ളത്. എത്രതന്നെ ദുർബലമാക്കപ്പെട്ടിട്ടുണ്ടെങ്കിലും ഇന്നത്ത പല ആരോഗ്യപ്രതിസന്ധികൾക്കുമുള്ള സാധ്യതകൾ പാരമ്പര്യവൈദ്യത്തിൽ ഏറെയുണ്ട്. പാരമ്പര്യ വൈദ്യവിഷയം സംബന്ധിച്ച വൈജ്ഞാനിക പഠന-പരിശീലനങ്ങൾ തുടങ്ങാനുള്ള ഔദ്യോഗിക ശ്രമങ്ങൾ കേരളത്തിൽ അടുത്തകാലത്തായി ഉണ്ടായിട്ടുണ്ട്. പാരമ്പര്യ വൈദ്യ സമൂഹം അതിനെ വലിയ മുന്നേറ്റമായാണ് കാണുന്നത്. അത്തരം ശ്രമങ്ങളിൽ പതിയിരിക്കുന്ന അപകടങ്ങളെക്കുറിച്ച് ബന്ധപ്പെട്ടവരുടെ ശ്രദ്ധയുണ്ടായതായി കണ്ടിട്ടില്ല. പാരമ്പര്യവൈദ്യത്തെ ഒരു സർവ്വകലാശാലയുടെ തലത്തിലേക്ക് ഉയർത്തികൊണ്ടുവരാണ് ശ്രമിക്കുന്നതെന്നാണ് സംസാരം. രാജ്യത്ത് സർവ്വകലാശാലയെന്ന വിദ്യാഭ്യാസ വ്യവസ്ഥയെസംബന്ധിച്ചു നിലനിൽക്കുന്ന നിയമക്രമങ്ങൾക്കുള്ളിൽ പാരമ്പര്യ വൈദ്യവിദ്യയെ എങ്ങനെയൊക്കെയാണ് ഉൾക്കൊള്ളിക്കാനാകുക എന്നതിനെക്കുറിച്ച് നല്ല വ്യക്തത ഉണ്ടായില്ലങ്കിൽ വെളുക്കാൻ തേച്ചത് പാണ്ടായിത്തീരുന്ന ദുരന്തമാകാനിടയുണ്ട്. പാരമ്പര്യവൈദ്യന്മാരുടെ ചികിത്സാ സ്വാതന്ത്ര്യത്തെ സംബന്ധിച്ച് അടുത്തകാലത്ത് രാജ്യത്തുണ്ടായ നിയമങ്ങൾ പാരമ്പര്യവൈദ്യത്തിന്റെ അസ്തിത്വത്തെ പാടേയില്ലാതാക്കുന്ന രീതിയിൽ വിരോധാഭാസകരമായതാണ്. പാരമ്പര്യവൈദ്യം ചെയ്യന്നയാളെ "വൈദ്യൻ" എന്ന പേരുപറയുന്നതിനെ അത് വിലക്കുന്നുവെന്നാണ് അറിയാനായത്. അതിന്റെ അപകടത്തെക്കുറിച്ച് വൈദ്യന്മാർക്കിടയിലോ മറ്റോ എന്തെങ്കിലും ചർച്ചയുണ്ടായത് കണ്ടിട്ടില്ല. പാരമ്പര്യവൈദ്യത്തിനെ അംഗീകരിക്കുന്നുവെന്ന വ്യാജേന അതിന് അങ്ങേയറ്റം അപമാനകരമായതാ ക്കുന്ന നടപടിയാണ് സർക്കാരിന്റെ ഭാഗത്തുനിന്നുണ്ടായിട്ടുള്ളത്. അതിനെ ഒറ്റപ്പെട്ട നടപടിയായി കാണാനാകില്ല. പാരമ്പര്യവൈദ്യം പോലുള്ള ജനവിദ്യാ, ജനസംസ്‌കാര പാരമ്പര്യങ്ങളെ ഇല്ലായ്മ ചെയ്തുകൊണ്ട് ആഗോളതലത്തിൽ നൂറ്റാണ്ടുകളായി നടക്കുന്ന പ്രവർത്തനങ്ങളുടെ തുടർച്ചയാണ് ഇപ്പോഴുണ്ടാകുന്നതും. പാരമ്പര്യങ്ങളെ തട്ടിയെടുത്ത് സ്വായത്തീകരിക്കുകയും വികൃതമാക്കി ഉപയോഗപ്പെടുത്തുകയും ചെയ്യുന്ന പലവിധ പദ്ധതികളുടെ ഏതെങ്കിലും തന്ത്രത്തിന്റെ ഭാഗമായാണോ പുതിയ പ്രീണന നീക്കങ്ങളുണ്ടാകുന്നതെന്ന് പരിശോധിക്കേണ്ടതുണ്ട്. നാട്ടറിവ് (ഫോക് ലോർ), വംശീയ വൈദ്യം, ശാസ്ത്രീയ പാരമ്പര്യം തുടങ്ങിയ വൈജ്ജ്ഞാനിക പദ്ധതികളിലൂടെ തുടർന്നുവരുന്ന പാശ്ചാത്യ അധിനിവേശ ചിന്തകളുടെ മായികവലയത്തിൽ പെട്ടുപോകാതിരിക്കാനുള്ള ജാഗ്രതയാണ് ഉണ്ടാകേണ്ടത്. ലോകാരോഗ്യ സംഘടന (WHO), യുനെസ്‌കോ, ആയുഷ്, ട്രാൻസ് ഡിസ്‌സിപ്ലിനറി യൂണിവേഴ്സിറ്റി (TDU) തുടങ്ങിയവയുടെ രൂപത്തിൽ മാറി മാറി അവതരിച്ചുകൊണ്ടിരിക്കുന്ന ചതിക്കുഴികളിൽപ്പെ ട്ടുപോകാതിരിക്കാൻ വല്ലവഴിയുണ്ടോന്ന് നോക്കുന്നതായിരിക്കും നല്ലത്. ഇത്തരമൊരു സാഹചര്യത്തിൽ പാരമ്പര്യവൈദ്യ പ്രസ്ഥാനങ്ങളുടെ മുൻകൈയിൽ നടത്താനുദ്ദേശിക്കുന്ന അനൗപക്കാരികമായ പ്രായോഗിക പഠനപരിശീലങ്ങൾക്ക് ഏറെ പ്രസക്തിയാണുള്ളത്. ആരോഗ്യരക്ഷാ-വൈദ്യ വിഷയങ്ങളിൽ മൗലികമായ താല്പര്യവും കഴിവുമുള്ള ആർക്കും കുട്ടിക്കാലംമുതൽക്കേ വൈദ്യപരിശീലനം നടത്താൻ കഴിയുന്ന ജനകീയ സംരംഭങ്ങളാണ് ഇക്കാലത്ത് ഏറെ പ്രസക്തമായേക്കും. അതിനുമുൻപ്, തുലോം കുറച്ചുമാത്രം അവശേഷിക്കുന്ന പാരമ്പര്യവൈദ്യകുടുംബങ്ങൾക്ക് വൈദ്യരംഗത്ത് നിലനിൽക്കാൻ പ്രേരണയാകുന്ന സാഹചര്യങ്ങളുണ്ടാകണം. അങ്ങനെയുള്ളവരുടെ കീഴിൽ പരിശീലനം നേടുന്നവർക്ക് സ്വാതന്ത്ര്യമായി ചികിത്സനടത്തി ഉപജീവനം നേടാനാകുകയും വേണം. എങ്കിൽ മാത്രമേ കുറ്റിയറ്റുപോയ വൈദ്യപാരമ്പര്യങ്ങളുടെ കണ്ണികൾ ഏതെങ്കിലും രീതിയിൽ വീണ്ടെടുക്കാനാവുകയുള്ളൂ. പി കെ ശശിധരൻ 9447262817 https://pillathaangi.blogspot.com